Dä kölsche Jesandte

Vör dausend Johre un e paar Woche
zwei Kaiser levvten unger d’r Sonn.
Dä eine, Karl, dä soß en Ooche,
dä andre en Byzanz om Thron.

Eines Daags daach Karl d’r Decke:
»Heller weed noch minge Jlanz,
wenn ich ne Jesandte schecke
zo däm Kaiser vun Byzanz!«

Also deit hä sich bedenke,
wählt us Kölle sich dä Franz,
scheck, belaade met Jeschenke,
Franz noh‘m Kaiser vun Byzanz.

Franz wood iehrevoll empfange:
unger Böckling un Jeschwafel
aanjedon met jolde Spange
un plazeet aan Kaisers Tafel.

Soß op echtem Zobelfell
zwesche Ritter, Fööschte, Jrafe.
Hummer wood un Lachsforell
vürjelaat vun schwazze Sklave.

Plötzlich ävver kom die Wende,
weil noh urahlem Jesetz
keiner durf dat Esse wende,
wat beim Kaiser vürjesetz.

Doch dä Kölsche, der vun su’ner
ahle Vürschreff nix jewoss,
driehten Lachs un driehten Hummer,
datt ’e och die Röcksick koss.

Do schaff dä Adel sich Jehüür,
dä schwere Frevel enzedämme,
die hellije kaiserliche Iehr
bedingungsloss en Schotz ze nemme.

D’r Kaiser selvs kunnt sich nit dröcke!
»Dir steiht d’r Duut zo, Franz vun Kölle.
Doch äh mer dich en’t Jenseits schecke,
will ich dir noch ne Wunsch erfölle!«

Säht dä Franz: »Nur eine han ich,
klein – un enfach uszeführe …«
Drop dä Kaiser: »Jot, dat kann ich,
sag, wat du dir wünschs, ich hüüre.

Nur – dat Lewe dir ze schenke,
dat wör jäj’n de Tradizjuun.
Söns darfs du dir alles denke,
sprich et us, du häs et schun!«

»Stirve mäht mir nix! Jedoch
wünsch ich vör däm Füsiliere:
Wer dä Fesch mich wende soch,
sull et Ougeleech verliere!«

Jedem dät d’r Odem stocke,
mucks- un müüsjestill et wood.
Un d’r Kaiser reef verschrocke:
»Ich, ich han et nur jehoot,

andre han et mir jestoche,
weil ich jo d’r Kaiser ben,
doch ich schwör bei minge Knoche:
Ich han selver nix jesinn!«

»Weil dä Schwur en jod Method es,«
reef do laut de Kaiserin,
»schwör ich bei d’r Mutterjoddes:
ch’han jenausu nix jesinn!«

Un die Jrafe un Wesire
schwöre bei Sankt Aujustin,
schwöre, schwöre dousend Schwüre,
dat se all’mol nix jesinn.

»Woröm weed ich dann beschuldig,
wo doch keiner jet jesinn?
Wer, wie ich, däm Kaiser huldig,
weiß, dat ich nit schuldig ben!«

Schamme dät sich do dä Adel,
janz Byzanz hatt schlääch Jewesse,
denn vum kölsche Franz dä Tadel
trof jenau un hät jesesse.


Menü